Հուլիսի 12-ին հայկական տաղավարի համադրող Ադելինա Կուբերյան ֆոն Ֆյուրշթենբերգը և մասնակից արվեստագետներից Արամ Ջիբիլյանը Գաֆէսճեան արվեստի կենտրոնի հատուկ միջոցառումների սրահում էին: Երեկոյի ընթացքում ներկայացվեց վավերագրական ֆիլմ հայկական տաղավարի մասին, ինչպես նաև հյուրերն անձամբ պատմեցին իրենց տպավորությունների մասին, տաղավարի գաղափարի և կոնցեպտի կարևորության մասին:
2015թ.-ի մայիսի 6-ին Վենետիկում մեկնարկած 56-րդ միջազգային բիենալեի գլխավոր մրցանակակիրը Հայաստանի Հանրապետության ազգային տաղավարն էր: Ազգային լավագույն մասնակցության համար «Ոսկե առյուծն» այլևս մեր ձեռքերում է և սա փաստ է, որ մենք արձանագրեցինք առանց խորապես հասկանալու դրա կարևորությունն ու ներքին խնդիրները: 
Պատճառն այն է, որ երևույթը փաստացի տեղի ունեցավ մեզնից հեռու, առանց մեր անմիջական մասնակցության ու իմացության: Հաղթանակը օտար էր թվում, անհասանելի մի բան կար այդ հաղթանակի մեջ:
Սա հատկապես այն պատճառով, որ թե մասնակից արվեստագետները, և թե համադրողը սփյուռքահայ էին և հայրենիքում պակաս հայտի, իսկ աշխատանքները մեր լայն հասարակայնությանը խորթ մի մոդել էին ներկայացնում, մի տեսակ, որի անունը ժամանակակից արվեստ է, մի բան, որ առայժմ դժվար ընկալելի է մեր հասարակության համար: «Հայություն» (“Armenity”) խորագիրը կրող տաղավարի համադրող Ադելինա Կուբերյան ֆոն Ֆյուրշթենբերգը մասնակցության համար ընտրել էր սփյուռքահայ արվեստագետների` աշխարհի տարբեր երկրներից: Նպատակը աշխարհի տաղանդաշատ հայ արվեստագետներին միևնույն գաղափարի շուրջ միավորելն էր, իսկ այդ գաղափարն այս տարի Հայոց ցեղասպանության 100-րդ տարելիցն էր և ըստ ժյուրիի անդամների այն մատնանշում է միջմշակութային ազդեցությունների կարևորությունը:
Ահա թե ինչու տաղավարի հիմնական կոնցեպցիան վերաբերում էր տեղափախության ու տարածքայնության, արդարության և խաղաղության թեմաներին: Անկախ իրենց ծննդավայրերից, մասնակից արվեստագետները հիշում և հարգում են իրենց հայկական արմատները: «Հիշողություն», «արդարություն», «զինադադար» հասկացություններն այս նախագծում հաղթահարում են «տարածքներ» և «աշխարհագրություն» հասկացությունները: Հայկական տաղավարն ըստ ավանդույթի տեղակայված է Սուրբ Ղազար կղզում, որը 18-րդ դարից հայկական լուսավորչության ծաղկուն կենտրոններից է եղել: Փաստորեն՝ Սփյուռք ու Հայաստան, կրկին ցեղասպանության թեման ու կրկին հայկականություն, բայց այս անգամ ամեն ինչ միանգամայն այլ է:Այս հասկացությունների զարմանալիորեն մի այլ ընկալում կա տաղավարի կոնցեպտի մեջ: Եվ գուցե հենց սա է հեռացնում մեզ մեր հաղթանակի հարազատ ընկալումից: Այժմ ժամանակակից արվեստ ասելով հասկանում են խնդիր, կոնտեքստ, գաղափար, ընկալում, կոնցեպտ, այն ներգրավում է սոցիալ-քաղաքական խնդիրներ, վերածվում մի կուռ համակարգի, որտեղ հաճախ զգայական-հայեցողության մասը երկրորդային կամ շատ ավելի անկարևոր է դառնում և դիտողից հաճախ պահանջում նախնական պատրաստվածություն, ինչպես օտար լեզվով գրված մի նոր գիրք: 
Հետևաբար մեր հաղթանակած տաղավարին բավական չէ մոտենալ միայն զուտ արվեստի տեսանկյունից: Այն բազմաթիվ խնդիրներ առաջ քաշող հարթակ էր, որտեղ ողջ աշխարհի ուշադրությունը ևս մեկ անգամ սևեռվել էր Հայաստանի կողմը: Այն մի յուրահատուկ դիսկուրս էր հայկականության, ազգի, տարածքային խնդիրների, փաքրամասնություն լինելու խնդիրների մասին: Նման համամարդկային, միևնույն ժամանակ մեզ համար այդքան կարևոր խնդրի արծարծման պարագայում հաղթանակած լինելը մեզ համար միանգամայն բացառիկ երևույթ է, և սա այլևս իրողություն է, որ հայ ժամանակակից արվեստը տանում է զարգացման մի նոր ճանապարհով: Սակայն մեր հասարակության կողմից դրա ընկալման և արժևորման խնդիրները մնում են անհասկանալի, ահա թե ինչու, շատերը պարզապես պահանջում էին տաղավարը ցուցադրել նաև Հայաստանում, և այս տեսանկյունից, Գաֆէսճեան արվեստի կենտրոնի նախաձեռնությունը շատ բան կարող է փոխել:
Վենետիկի 56-րդ միջազգային բիենալեի Հայաստանի Հանրապետության ազգային տաղավարի մասնակից արվեստագետներն են`
Հայկ Այվազյանը (Լիբանան), Նիգոլ Բեզջիանը (Սիրիա, ԱՄՆ), Աննա Բողիգույանը(Եգիպտոս), Հերա Բույուքթասցյանը (Թուրքիա), Սիլվինա Տեր–Մգրտչյանը (Արգենտինա, Գերմանիա), Ռենե Գաբրին և Այրին Անաստասը (Իրան, Պաղեստին, Լիբանան), Մխիթար Գարաբեդյանը (Բելգիա), Աիկատերինի Գեգիսյանը(Հունաստան), Երվանդ Գիանիկյանը և Անժելա Ռիչի Լուչին (Իտալիա), Արամ Ջիբիլյանը (ԱՄՆ), Նինա Խաչադուրյանը (ԱՄՆ, Ֆինլանդիա), Մելիք Օհանյանը (Ֆրանսիա), Միքայել Օհանջանյանը (Հայաստան, Իտալիա), Ռոսանա Պալազյանը (Բրազիլիա), Սարկիսը (Թուրքիա, Ֆրանսիա), Հրայր Սարգսյանը (Սիրիա, Միացյան Թագավորություն):
![[:am]Հասմիկ Բարխուդարյան[:ru]Асмик Бархударян[:en]Hasmik Barkhudaryan](http://arvestagir.am/wp-content/uploads/2014/03/HasArvestagir-100x100.jpg){kind=avatar}
Թողնել մեկնաբանություն